Mizoram Bana Kaih (Handholding) Scheme hi Mizoram Sorkar flagship programme pawimawh tak a ni a. He scheme hian mi mal, entrepreneur, startup leh pawl hrang hrangte chu sumdawnna, eizawnna leh hnathawhna thar siam tura financial, technical, institutional leh market support pek a, Mizoram ram economy tihhmasawn leh mipuite intodelhtir hi a tum a ni. Project leh thate chu hlawhtling taka kalpui a nih theih nan Credit linkage, training, capacity building, market linkage hmangin, kaih ngaite an banah a kai dawn a ni.
Hmasawnna ziktluak thlen tir tura Mizoram Sawrkar flagship scheme a ni. Sawrkar chuan hmasawnna tura thawhpui tur, Progress Partner (PP) thlangin Mizoram hmasawnna tura awmze neia ke an pen theih nan Bana Kaih (Handholding) Scheme hnuaiah dahkham (collateral) leh guarantor ngai lovin bank kaltlangin loan a pe chhuak a. Hma la tha leh hlawhtling, loan a hun taka rul thinte chu an loan pung (interest) rulhna zawng zawng (100% interest subvention) a tumsak bawk. Tin, loan la thei dinhmuna ding lo, mi harsa leh kum upa lam te bana kaih (handhold) nan Chief Minister Special Package (CMSP) Grant siam a ni bawk a, an hmalakna turah tanpuina an mamawh dan a zirin ₹ 50,000/- thleng sum fai pek theih a ni.
He scheme hian innovation, science leh technology hmanga hmasawnna a ngai pawimawh hle. Innovator, startup leh technology-based enterprise te chu thil thar ngaihtuahna leh solution siam kawnga tanpui leh bana kaih a tum a. Research & Development (R&D), digital technology, scientific innovation leh local knowledge te hmangin productivity, value addition leh market competitiveness tihsan a tum. Hei hian Mizoram-ah innovation ecosystem chak zawk siam a nih bakah, thil thar ngaihtuahna te chu business hlawhtling leh employment siam tura hmalakna pawimawh a ni.
Bana Kaih Scheme hnuaiah hian Loan Assistance leh Chief Minister’s Special Package Grant a awm a. Trade hrang hrangte hi Sector nga (5) ah then a ni a. Sector hrang hrangte loan mamawh zat tlangpui leh an sum thawh chhuah theih tlangpui te, Progress Partner tana hlawhchhamna awm theih dan (risk) te thlir chungin Sector hrang hrangah loan lak theih zat tam lam bithliah a ni. Heng hi pelh loh ni se.
- Manufacturing sector-ah ₹50,00,000 thleng;
- Service sector-ah ₹20,00,000 thleng;
- Animal Husbandry sector-ah ₹10,00,000 thleng;
- Dawr siamna (petty trade) atan ₹10,00,000 thleng; leh
- Lo/huan thlai chinna leh huan nghet puitling tawh enkawl nan ₹2,00,000 thleng
Bana Kaih (Handholding) loan leh CM Special Package dilna kawnga harsatna tawk leh zawh chian duh nei apiang tana biak tur, Handholding Helpline siam a ni.
HELPLINE No.: 8119-019-900
- Thawhtanni atanga Zirtawpni inakarah, office hun chhung (9:00 AM - 5:00 PM) in phone call emaw whatsapp message hmangin harsatna leh zawhna thlen theih a ni.
- Phone call emaw Whatsapp Message hmanga harsatna leh zawhna thlen turte chuan dilna form Reference No. emaw, EPIC number emaw tal hriat lawk ni se.
Helpline kaltlanga harsatna leh zawhna thehluh hi a chingfel thei tu hnenah tak thlen chhawn zel a ni a. Bana Kaih (Handholding) loan leh CM Special Package dilna te hi dilna thehluttu in a account-ah lutin a thlen chin a hre thei a. Hetianga status en thiam lo tan te, dilna form tih sual palh siam that ngai te, dilna thehlut thei lo te, leh harsatna dang dang nei tan Handholding Helpline No.: 8119-019-900 ah thlenin harsatna hi awlsam taka sutkian theih a ni.
Tin, Bana Kaih (Handholding) loan leh CM Special Package dilna hi online in a thlawna thehluh theih a ni a. Online form submit thiam lo tan pawh Department hrang hrang a Search Team-ten an pui thei a. District-tina DC office bakah SDO(C) Office leh BDO Office zawng zawngah a thlawna puitu tur ruat a ni bawk.
Bana Kaih (Handholding) loan leh CM Special Package dilna thehluh tumte tana link pawimawh te:
1. Dilna thehluhna tur : HETAH HIAN CLICK RAWH
2. Department a Nodal Officer-te: HETAH HIAN CLICK RAWH
3. Handholding Youtube Channel: HETAH HIAN CLICK RAWH
4. Loan Dilna thehluh dan: HETAH HIAN CLICK RAWH
5. CMSP Dilna thehluh dan: HETAH HIAN CLICK RAWH
