THLIPUI(CYCLONE): World Meteorological Organisation (WMO) chuan Tropical Cyclone hi thli chak zawng darkar khata Km 63 aia chaka tleh sawi nan a hmanga. Hetiang Tropical Cyclone hi hunbi neia rawn thawk a ni tlangpui a, chhiatna nasa tak thlentu a ni. Tropical Cyclone hi kum tin vawi 80 atanga vawi 100 vel khawvelah hian a tleh ziah anga ngaih a ni. Tropical Cyclone hi a hming ang hian tropical area tuipui chung atanga insiam a ni tlangpui a ni. Tropical Cyclone inlumleh chhoh dan chu hetiang hian chhawng 3-ah a then theih a:
a) A lo insiam chhuah leh zawi zawi a a inmun zel dan (Formation and initial development): Tropical Cyclone insiam chhoh zelna atan hian khawmual lam leh tuipui lam dinhmun awmdan 4 pawimawh tak tak a awm a, chungte chu:-
i. Tuifinriat/tuipui chu meter 60 chunglam emaw a thuk lam meter 60 a thuk chin chu Centigrade degree 26 aia sang alo nihin tuihu tam tham deuh tak alo insiam thin a, chu tuihu boruaka invawrh vel avang chuan Tropical Cyclone hi alo insiam ta thin a ni.
ii. Meter 7000 chin chunglamah chuan lei tuamtu boruak chu alo hnawng a, alo sakhat tial tial a, chhumah te, ruahah tea lo insiam a, lum chakna (Heat energy) avanga nekna (Pressure) ten nen Tropical Cyclone hi alo insiam ta thin ani.
iii. Chutianga boruak alo danglam tawh chuan chhum hlawm lian deuh alo indina,a inzial let tup tup a, hetiang chhum inlet tup tup hi tuipui atanga tuihu lo chhuakte nen innawr tawnin boruak che vel nasa taka lo siam ta thin a ni.
iv. Tin, Equator atanga degree 4 atanga degree 5 vel huam chhungah chutianga boruak han in lumlet vel chu lei inher kual (Rotation) hian boruak inher tlemna hmun (Low pressure centre) velah chuan alo ti kiam ve thei thung a ni.
b) A insiam puitlin dan (Full maturity): Tropical Cyclone lo insiam pui tlin dan en leh ta ila, Radar leh Satellite atanga thlir chuan Tropical Cyclone puitlinga insiam chho tawh pianzia chu chhum dum leh ukpui pui, hlawm lian taka sang tak taka inzial tup tup mai, Mizotena Bahrangulzem kan tih anga inzemkual pup pup mai a ni a, khawpui ri nen a vir kual pup pup ang mai hian a lang thin. Chutianga a inzial hlawm laiah chuan a kengkhawngtu niawm tak hlawm lian bik hi a awm a; chuchuan chhum hlawm nem tak ‘Mit’ (eye) niawm taka lang hi a tuam vet chiai chiai a. He Mit ang tak hian thli chakna paiin km 20 atanga 60 hawlh tlang hmun a awh thei a, chumi lai tak chu puk thim tak ang mai hian a langa, thil bial dum tak, chhum var takin a hual vel ang takin a langa. Chu ‘mit’ (eye) ang tak awmna atang chuan pawn lam hawi zawngin Thlipui na tak, darkar khata Km 250 laia chakte pawh a rawn insiam thei ta thin a ni. Hetiang hian Tropical Cyclone hian mihringte tan pawi nasa leh rapthlak tak tak a rawn thlen ta thin a ni.
Cyclone hian a ken tel chu ruah nasa tak anih avangin thli a tleh zawh hian tuihawk alo tam ta em em thin a, lui kuang alo khata buaina namen lo a thlen zui ta thin a, leimin tam tak pawh a thleng fo thin a ni.
Cyclone laka invenna: Cyclone thlipui na tak tak lakah hi chuan in ven a harsa viau mai a, ram ropui USA ah pawh khuan thlipui laka tuarna hi a nasa em em reng mai a ni. Amaherawhchu Pathian thil duan ropui tak hi dang zo lomah ila kan tih theih thenkhatte in han thlirho teh ang:
• Cyclone tleh hun lai chuan TV leh Radio atangin warning a awm leh awm loh ngaichang thin rawh. Hei hian nasa takin a tanpui ang che.
• Thlipui hian Tek a ken tel fo avangin thlipui tleh laiin electronic thil reng reng hmang suh. Electric line pawh off vat a tha zawk.
• In in emaw i awmna emaw a him dawn lo ni a i hriat chuan chhuahsana, hmun him lam pan mai a tha.
• Motor i khalh lai a thlipui alo tleh chuan hmun him, electric ban/hrui leh thingkung etc hlatah i motor ti dingin park rawh.
• Hmun him i panna lamah rangva leh thil dang thlawk i tawng thei, fimkhur hle ang che.
• Thlipui tleh hun lai chuan i inbula thing kung upa tawh lam emaw thing zar tliak mai theite chu kit/sat thla ang che. Mizoramah hian thlipui avanga tawrhna rapthlak, mihring a za tela han thihna ang chi te hi kan la tawng lova, a vanneih thlak hle. Amaherawhchu India Meteorological Department-in‘Wind and Cyclone Hazard Zoning Map’ an siam kan en chuan Mizoram hi thlipui na tak tleh theihna area, ‘Very High Damage Risk Zone’ ahdahin,kan dinhmun a dah him lo viau mai.
References:
1. Text books of M.Sc. (Disaster Mitigation), Indian Institute of Ecology and Environment (IIEE) New Delhi Publications.
2. Manual on Natural Disaster Management in Mizoram – ATI (Disaster management Cell), Mizoram, Aizawl.
3. Lalrokima Chenkual, Dr. Disaster Management Kamkeuna, pp 37 – 87, A training module published by ATI, Mizoram Aizawl.
4. Lallianthanga, P.C, Citizen’s Guide to Disaster Management.
5. Internet etc.
