SCIENCE & TECHNOLOGY IN DEPARTMENT INTUAITHARNA AN HMANG
Ni 25.1.2016 (Thawhtanni) khan Directorate of Science & Technology Office-a thawktute chuan kum 2016 atan intuaitharna (retreat) hun Beraw-a Mizoram Science Centre-ah an hmang.
He intuaitharnaah thusawiin Dr. R.K.Lallianthanga, Chief Scientific Officer chuan kum 2015 chhunga Science & Technology leh a thla zar hnuaia mi – Mizoram Remote Sensing Application Centre (MIRSAC), Mizoram Science, Technology & Innovation Council (MISTIC) leh Patent Information Centre (PIC) te hmalak dan tlangpui a sawi a. Mizoram hmasawnna atan Central leh State Department te bakah pawl hrang hrang (agencies) te atanga project an thawh te tarlangin kumin 2016-ah chuan nasa zawka tan la turin Officer leh Staff te chu a ngen a. Mizoram sorkarin Science & Technology hi a ngaipawimawh hle a, kum 2015 – 16 chhunga sum hman tur a ruahman pawh kum dang aiin cheng nuai 40 chuangin a pun a nih kha. Tunlai khawvel hmasawnna hi Science-a innghat a nih tawh avangin theih tawp chhuaha tan lak a ngai tawh a ni a ti a. Ram dang leh state dangte hmasawn ruala hma kan sawn theih nan “vawiina tih tur chu naktuk atan khek suh” tih pawh hi a tawk ta lova, “naktuka tih tur pawh a theih hram chuan vawiinah ti rawh” ti a thlakin thupuia kan neih a ngai tawh a ni a ti.
He intuaitharnaah hian Pi Lallianmawii, State Informatic Officer, NIC pawhin thusawiin NIC in hna a thawh dan tlangpui a sawi a. Mizoram sorkar hnuaia Department hrang hrang te hnathawh computerised te, Land Revenue computerised te, Mizoram atanga Video Conferencing hmanga meeting pawimawh an buatsaih dan te leh Internet hmanga website chi hrang an siam dan a tar lang a. Mizorama NIC din a nih tirh atanga vawiin thlenga Science & Technology hi Central-in Nodal Department-a pawma MOU a signed pui thu leh he Deparment nena thawhho nuam an tih thu leh thlamuan thlak an tih thu te a sawi bawk.
He intuaitharna inkhawm kaihhruaitu Senior Scientific Officer Dr. Lalnunsiama Colney chuan thil hlu leh ropui hi a tam leh tlem emaw a innghat a ni lova, lunghlu pawh hi a tlem hle naa, a hlu tlat a ni. Chutiang bawkin Science & Technology pawh hi lian lo mahse takna leh taima taka kan thawh chuan a hlu zel ang a, chu chuan hmasawnna a thlen dawn a ni a ti. Hun tawp kharna hun hmangin Er. H.Lalsawmliana, Senior Scientific Officer chuan lawmthu sawiin vawiina intuaitharna hun kan hmang hi hlawk taka kan hmana, thu chu tisaa chantir theuh turin kalkhawmte chu a ngen a ni. He intuaitharnaah hian Science & Technology hnuaia Officer leh Staff te bakah National Informatic Centre (NIC) a Officer leh Staff thahnem tak an tel a ni.
